Vice mayor Cua, Hugot ang Suporta sa Pagtubag Reklamo sa Katawhan

Hugot ang suporta sa bise-alkalde ning lungsod sa paghatag alibyo sa gisang-at nga reklamo sa katawhan sulod man o gawas sa iyang opisina. Kini human niya madungog ang mga sumbong sa lumulupyo ning lungsod sa pipila ka mga kakulangan sa natad sa serbisyo.

Gipunto ni Cua may mga ordinansang ga exists apan giangkong kulang sa implementasyon. Sama na lamang sa pagregulate sa internet Cafes og Videokehan. Lakip na ang paglimpyo sulod o atbang sa mga istablisyemento sa mercado nga matod pa responsibilidad na sa mga nanag-iya sa pwesto pinaagi sa ordinansang gisang-at ni Coun. Lingling Cruz.

Ang ordinansa sa videokehan namugna niadto pang tuig 2005, kung diin gikinahanglang ang mga videoke stablishments sarado og dili makahatag distorbo sa silingang establisyemento. Lakip na dinhi ang distansya sa mga lumulupyo sa lugar. Apan daghan gihapong videokehan ang wa musonod sa maong ordinansa.

Sa pikas bahin, matod sa bise Mayor nga may mga regulasyon sa pagpadagan og internet cafes, sama na lamang sa dili pagpasulod sa mga estudyante gikan alas 7am-12sa udto og ala 1-5 sa hapon. Apil na dinhi ang pagdili sa phornography sulod sa Internet Cafes og dili pwedeng mag-operate sa 24 oras. Kini human ang reklamong may pipila ka Internet cafes sa lungsod nga nagapasulod og mga kabatan-unan sa oras sa klase.

Nagsaad si Cua nga iyang ipaabot ang maong mga sumbong ngadto sa opisina sa mayor aron sa tukmang aksyon. - Andrew Tabugoc